聯賽榜5哥阿仙奴會喺尾場迎戰尾4嘅白禮頓。阿仙奴聯賽3連敗，依家落後第4位嘅車路士2分，爭入前4形勢被動，不過佢哋轉戰歐霸表現卻脫胎換骨，上周中喺首回合主場大勝華倫西亞3比1，嚟緊周中次回合作客只要唔好輸多過1球就可進身決賽，透過贏得歐霸冠軍取得來屆歐聯入場券似乎更有主動權。阿仙奴主帥艾美利近期喺聯賽多起用拿卡錫迪打單打箭頭，攻擊力減半，加上對上3場聯賽皆單場失3球，今場會加強防務望保清白之身。
白禮頓唔大敗都掂
由於尾3嘅卡迪夫城喺周日凌晨主場鬥水晶宮，如果卡迪夫城輸波便會宣布降班，就算和波，白禮頓保持3分差距兼超過10個得失球差優勢，今場鬥阿仙奴同最後一場鬥曼城，只要攞多1分、甚至唔好大敗亦好大機會護級成功。白禮頓近7場聯賽僅入1球，鋒力疲弱係不爭事實，不過佢哋今季聯賽作客其餘5支Big6球隊有3次輸1粒，對住火力強勁嘅曼城都係輸0比2，一心死守未必冇得打，中位數2.5球細盤捧得過。
（Now 621周日晚11時30分直播）