心急搶W有前冇後
英超進入最後兩輪，排第6嘅曼聯能否取得歐聯入場券，今晚對包尾兼降咗班嘅哈特斯菲爾德影響重大。曼聯雖然求勝心切，但近日防線甩漏之多令人慘不忍睹，連一向最穩健嘅迪基亞都出晒醜，與其贏兩粒先開到上盤，倒不如博中位數2.5/3球大盤更實際。
（Now 622周日晚9時直播）
曼聯現時落後第4嘅車路士3分兼8個得失球，形勢上可謂相當被動，唯一慶幸嘅剩番兩場算易踢，煞科戰對尾三嘅卡迪夫城，若前列球隊失分，曼聯仲有機會爭入前四。
曼聯近況之差相信唔使點多講，樂比最想指出嘅係防線嘅漏洞，曼聯已經連續13場賽事失波，係1970年以來最差嘅紀錄。除咗個別球員質素所限，領隊蘇斯克查嘅布防亦好有問題，之前對巴塞隆拿嘅「一字聯防」及「垂直防線」，已成為球迷嘅笑柄，近幾仗亦唔見有太大改善，最慘係連迪基亞嘅信心都受到影響，上仗對車仔再犯低級錯誤，有球迷甚至要求佢唔好再擔任正選，不過蘇斯克查卻仍對佢投以信心一票。
當然，如果比起其他球員，迪基亞仍算功可抵過的，防線上艾歷拜利已提早收咧，菲爾鍾斯、基斯史摩寧都有傷上陣成疑，預計中堅將由域陀連迪路夫及馬高斯盧祖攜手擔任，想終止連續失球紀錄似乎有難度。
哈特斯菲爾德唔刻意守
另一邊廂哈特斯菲爾德情況亦惡劣，季中改由施維特擔任領隊後不但未有起色，表現似乎仲差過華拿嗰陣。哈仔過去23場聯賽僅得1勝1和，輸波已輸到麻木，自正式宣布降班後，過去4場敗仗失咗15球，睇嚟班球員已放開懷抱，唔會刻意死守，但求踢場好波送畀球迷，喺呢個心理狀態下，捧大盤相信係最佳選擇。