周二凌晨英超獨腳戲，「藍月亮」曼城主場迎戰「狐狸」李斯特城，力爭衞冕嘅曼城為保證全取3分踢法愈顯保守，尤其呢場仲要忌憚李城Big6殺手占美華迪唔畀佢偷雞，「藍月亮」如果輕敵隨時出事，今場讓到2/2.5球，捧李城下盤穩陣。
（Now 621周二凌晨3時直播）
進入英超爭標直路衝刺，聯賽已豪取12連勝嘅曼城，只要做好自己，穩穩陣陣贏埋最後兩輪，唔使睇對手利物浦結果如何，就可確保冠軍到手，命運盡在自己掌握中。不過，前鋒阿古路近4場聯賽入得1球，史達寧又連續3場聯賽食白果，兩位頭號射手腳風都欠順，因此「藍月亮」近期變得保守，為保住勝果，每當領先後都拉布，近9仗都只係以2球或以下優勢取勝，比起季初頻頻大炒對手，進攻氣勢明顯減弱。
華Dee突擊牽制藍月亮
李城自新帥羅渣士接手後，近7場聯賽5勝，其中射手占美華迪就延續Big 6殺手本色，連同上場梅開二度助球隊以3比0大勝阿仙奴，「華Dee」對Big6已累積31個士哥；曼城為抑制呢位靠突擊揾食嘅Big6殺手，今仗相信唔敢將防線推得過前，「藍月亮」想大勝肯定有難度，寧捧李城下盤。