歐聯4強次回合話咁快又到，首回合淨吞3蛋嘅利物浦今晚主場再鬥巴塞隆拿，細鬼認為紅軍首回合踢得唔曳，戰果唔足以反映果場波形勢，今晚冇得揀必然搶攻，後防隨時出現漏洞，遇着有球王美斯坐鎮嘅巴塞，大盤（2.5球）值得留意。
利物浦上回合作客魯營，多次創造出具威脅埋門，未能取得作客入球只係唔夠運。佢哋今晚想反勝唔係天方夜譚，當年嘅「伊斯坦堡奇迹之夜」，球迷必定記憶猶新，細鬼對紅軍一班進攻球員充滿信心，相信今晚有力拎到入波。
不過紅軍攻還攻，巴塞反擊力絕對唔嘢少，首回合尾段紅軍大舉出擊，防線多次出現險象，如非奧士文尼迪比利等人「敗家」，利物浦絕對唔止輸3粒。今場紅軍爭取入球之餘，仲要諗計防止巴塞取得作客入波，絕對係極其艱鉅嘅任務，入球騷走唔甩。