記得在今屆歐聯8強剛剛誕生時，曼城、曼聯、利物浦及熱刺佔咗4席，重現英超盛世，而且各隊籤運唔算差，大家都憧憬再有英超球隊稱霸歐洲。殊不知，喺截稿前我未知利物浦對巴塞隆拿嘅4強次回合賽果時，如今最有機會殺入歐聯決賽嘅英超兵，只係剩番牌面較弱嘅熱刺，又有邊個會估得到呢？
阿積士新仔經驗差
熱刺喺今晚次回合造訪阿積士，荷蘭勁旅接連將皇馬及祖雲達斯踢出局，前曼聯中堅戴利白蘭特配合法蘭基迪莊等新星，打出悅目足球，連同首回合作客熱刺先贏1比0，無疑被睇高一線。不過踢波嘅嘢一場還一場，熱刺就算有哈利卡尼缺陣，但只要今仗盡快入波，抵銷咗阿積士嘅作客入球優勢，比賽便會返回起點，畢竟阿積士新仔太多，經驗不足，若然畀人追和，出現怯場情況唔奇，到時乜嘢事情都可能發生。熱刺喺冇任何心理包袱下，拚輸來打隨時有驚喜，抓緊機會首度殺入歐聯決賽，我認為受讓平半嘅熱刺，下盤值得捧場。
金句：事到如今，有誰估到熱刺係唯一英超隊有機入歐聯決賽。