兵工廠作客靠唔住
睇完歐聯，今晚輪到歐霸4強次回合展開，首回合落後1比3嘅華倫西亞，返主場鬥阿仙奴博翻盤。「蝙蝠軍團」首回合拎到作客入球，隨時係決定晉級關鍵；「兵工廠」作客曳，若然縮後嚟踢更難擋主隊猛攻，簡單要1.82倍主勝。
（myTV Gold 800、Now 644、有線662及602台周五凌晨3時直播)
華倫首回合雖以1比3不敵阿仙奴，都憑莫達迪亞卡拜拎到好重要嘅作客入球，今場目標十分鮮明，只要淨勝2比0就可躋身決賽。華倫今仗仲有防中高基連坐完波監復出，聯同守將基比爾包列斯達齊齊倒戈，對注重中場控制嘅「蝙蝠軍團」嚟講絕對係好消息。
蝙蝠軍團歐戰主場特醒
華倫主場出戰歐洲賽特別醒神，近5仗大獲全勝，包括去年歐聯分組賽贏過另一英超勁旅曼聯；陣中葡萄牙翼鋒干卡路古亞迪斯識入波又識助攻，配合腳風頗順嘅土炮箭頭洛迪高摩連奴，有力延續近期呢股「逆轉」潮流。
阿仙奴首回合靠拿卡錫迪同奧巴美揚包辦3球，先拔頭籌，不過後防欠穩都係未解決。上場聯賽主場畀白禮頓逼和失分，搞到「前4」凍過水，士氣點都有影響。況且「兵工廠」今季作客唔爭氣，近8仗作客僅得2勝1和5負，單計歐霸就輸過畀實力麻麻嘅巴迪同雷恩，今晚若然因領先兩球刻意求守，將進攻主動權拱手讓畀主隊嘅話就更牙煙，一於捧主勝。