周三凌晨英冠升班附加賽4強次回合，西布朗主場再鬥阿士東維拉。西布朗首回合輸1比2，仲有射手杜韋加爾紅牌被逐，要同笠臣簡奴齊齊坐波監，想反勝難度唔少，平手盤捧維拉。
（周三凌晨3時開賽，馬會網上文字直播）
正所謂拳怕少壯，早前喺歐聯捲起青春風暴嘅阿積士，就用實際表現證明後生先係贏波本錢，而英冠阿士東維拉今季亦係靠一班年輕球員擔大旗，其中年僅21歲嘅譚美阿巴謙就成為球隊頭號射手，計埋首回合射入為球隊反超比數嘅關鍵12碼，呢位車路士借將喺英冠已經累積射入26球。不過球隊真正核心，肯定非10號仔基亞利殊莫屬，呢位英格蘭23歲小將今季大放異彩，首回合貢獻1助攻之餘，仲為球隊博到12碼，次回合維拉有兩位明日之星壓陣，絕對有力再下一城。
西布朗兩大核心齊停賽
相反西布朗繼主力前鋒笠臣簡奴早前被罰停賽3場緣盡附加賽之後，首回合仲有另一位射手兼入波功臣杜韋加爾被逐，今晚兩大進攻核心決陣，勢將進一步削弱西布朗前場攻力。況且取得領先優勢維拉佔盡主動權，次回合打和都可以晉級，肯定會踢得更保守，西布朗形勢不容樂觀，阿士東維拉平手盤更好路。