周五晚續演3場女子世盃分組賽，頭場直播有D組日本女足火併蘇格蘭女足。日本首仗意外被弱旅阿根廷逼和痛失2分，為出線今仗不容再失；蘇格蘭首次亮相決賽周經驗不足，遇上新敗嘅日本更難爆冷，日本讓半一，波童捧上盤。
（有線603及604台周五晚9時直播）
近2屆女子世盃攞到1冠1亞嘅日本首戰落筆打三更，對住過去2次參賽6戰全敗嘅阿根廷竟然被悶和0比0。睇番該仗數據，日本全場8次射門僅得3中，控球比率有6成，表現的確唔理想，不過「粉紅兵團」勝在經驗夠，吸收上場教訓，相信今場更會打醒十二分精神。蘇格蘭上場面對同樣來自英倫三島嘅英格蘭，開波唔夠15分鐘已經落後，最終輸1比2，戰術發揮同傳球質素與一線球隊有距離，今場冇乜爆冷本錢。日本喺女子世盃遇上歐洲球隊表現特別醒神，對上4次交手全部贏晒，今場讓半一，上盤博得過。
英格蘭高妹恰死阿根廷
另一場D組賽事由英格蘭女足鬥阿根廷女足。兩支男子隊歷來喺國際賽曾經合力炮製唔少經典賽事，不過講到女子隊，阿根廷就完全未夠班，事關英格蘭對上4次出戰決賽周至少都能入到8強，其中上屆更奪得季軍；相反阿根廷之前2次打入女子世盃都係分組賽出局，而且3次對住歐洲球隊加埋失咗23球，擺明被身型高大嘅歐洲球員恰死，英格蘭讓2球照捧讓球主勝。
（周六凌晨3時開賽）