武磊搶鏡 反擊仲煞食
今晚有多場歐霸盃附加賽次回合上演，各路勁旅為入分組賽爭崩頭，阿King度咗條過關心水同大家分享。早場中國前鋒武磊效力嘅愛斯賓奴作客烏克蘭球隊索爾亞，索爾亞首回合落後1比3，今場焗攻隨時後防空虛，益咗擅打反擊嘅愛斯賓奴，入波唔會少，一於捧大盤。
（周五凌晨1時開賽）
闊別歐霸12年嘅愛斯賓奴，今季重返歐戰賽場有勇銳演出，近5仗歐霸全勝之餘，場場都入到對手3球或以上，真正做到火力全開。
歷基亞硬淨「細」頂格流
新季接過7號波衫嘅武磊，繼上圈斬獲歐霸處子球之後，上仗作客索爾亞再貢獻靚絕助攻，明顯同拍檔法古度費雷拉同馬迪亞斯華加斯踢出默契，配合剛加盟嘅阿根廷前鋒卡里利，「愛奴」鋒力更盛。主場出擊嘅索爾亞想晉級一定要入波，但顧得攻嚟後防分分鐘有閃失，大盤值得追捧。
另外兩場較遲開波嘅大戰，先有蘇超勁旅格拉斯哥流浪主場鬥波蘭代表歷基亞。計埋首回合0比0悶和「格流」，歷基亞今屆歐霸踢咗7場仲未失過波，後防堅係硬淨；「格流」喺謝拉特帶領下開季唔曳，但上仗聯賽小勝聖美倫所見，球隊兼顧兩條戰線略現疲態，加上嚟緊聯賽要硬撼「死對頭」些路迪，今仗但求穩陣贏波晉級，吼細盤上算。
最後介紹埋英超狼隊主場鬥拖連奴。狼隊今季野心唔細，奈何聯賽開局未算理想，踢盃賽更加想發圍，加上近4仗歐霸全開4球或以上，包括首回合作客3比2險勝拖連奴，既然攻強守弱，揀番大盤正路。
（周五凌晨2時45分開賽）