奧迪加特成材擔大旗
今晚西甲壓軸戰上演巴斯克火爆打吡，由畢爾包主場硬撼皇家蘇斯達。雖然畢爾包首輪贏過巴塞，但皇蘇今季同樣硬淨，從神童變「人球」馬田奧迪加特終於嚟料，加上近年打吡不落下風，讓球客勝值得捧場。
（Now 632周六凌晨4時直播）
兩軍同樣開季取得1勝1和，不過畢爾包陣中較年輕嘅蒙尼恩、伊拿基威廉斯始終未夠火候，關鍵時刻都係老將信得過，例如首輪爆冷以1比0擊敗巴塞隆拿，正正係靠後備入替嘅老將阿度里斯一箭定江山，上仗打和基達菲1比1，建功者係另一老將魯爾加西亞，正所謂最鋒利嘅刀亦都有生銹嘅一日，尤其係呢類打甩髀嘅打吡戰，真係體力差啲都捱唔到尾。
西維爾當旺上盤要追
相反，皇蘇一眾年輕球員已可擔大旗，除咗自家青訓產品奧耶沙巴爾同曼聯棄將贊奴沙外，馬田奧迪加特亦獲得重生，呢位4年前以16歲之齡加盟皇馬嘅挪威神童，近年慘變「人球」不斷被外借，上季喺荷甲嘅維迪斯交出入波及助攻「雙雙」數據，點知「銀河艦隊」依然睇唔上眼，今季再被借去皇蘇，好彩佢都爭氣，上仗作客馬略卡更攻入致勝士哥，表現sharp醒。翻查紀錄，雙方近4次聯賽碰頭，皇蘇取得3勝1和未輸過，明顯格食格，仲有得受讓咁筍，讓球客勝捧得過。
至於早少少開波嘅另一場西甲，「1哥」西維爾主場迎戰切爾達。西維爾開咧兩連勝，兼且全部冇失波，表現四平八穩，切爾達頭2仗取得1勝1負，但上仗對華倫西亞有中場丹尼斯蘇亞雷斯射失12碼，贏波只因對手踢得差，不能盡信，寧買當頭起，西維爾讓1球照要上盤。