英超1哥利物浦今晚會喺壓軸出場作客般尼，紅軍係目前唯一3戰全勝嘅球隊，但呢場3場全部都有失波，為咗掩飾後防不穩嘅問題，相信領隊高普會以攻代守，不過般尼對住紅軍特別有計，近5次鬥利物浦皆有進帳，中位數2.5球入球大趁熱食。
（Now 621及611台周日凌晨零時30分直播）
利物浦上場於Big 6大戰以3比1擊退賽前同樣保持全勝嘅阿仙奴，暫時以2分優勢排榜首。不過，利物浦並非無懈可擊，事關「紅軍」連續3場聯賽都有失波，而且同樣係領先2球或以上嘅絕對優勢下失守，頂替艾利臣比加把守最後一關嘅阿祖安卡斯迪路，始終畀唔到人太大信心，即使有華基爾雲迪積克喺前面幫手，紅軍整體防守力明顯下降。
好彩嘅係，高普手上有大量高質攻擊球員，「埃及文明」穆罕默德沙拿、沙迪奧文尼同羅拔圖法明奴冇病冇痛嘅話，真係無堅不摧，所以利物浦最佳踢法就係以攻代守，掩飾後防不穩嘅毛病。
般尼「第一隊入球」值博
般尼開季3戰1勝1和1負，當中包括聯賽開鑼戰以3比0大破修咸頓，唯一敗仗係作客1比2僅負阿仙奴，表現並唔失禮，射手艾殊利班尼斯連續3場聯賽有士哥，暫以4球排神射手榜次席，腳風不俗，而且般尼近5次鬥利物浦全部有波入，當中更有4次先開紀錄，2.5球入球大當然可取，3.8倍嘅般尼「第一隊入球」亦值得扒冷一試。