保贊來投鋒力升晒呢
美職打咗超過一半，各隊目標開始鮮明，除實力外落場決心都好緊要。聽朝蒙特利爾衝擊主場鬥華盛頓聯隊，暫列東岸第8位嘅衝擊踩油衝前7名，希望殺入季後賽，近期主場表現特別醒神，保贊嘅加盟亦令鋒力全面升呢，面對冇朗尼壓陣嘅華盛頓聯，衝擊唔會放過呢支季後賽席位主要競爭對手，阿King揀主勝做過關重心！
（myTV Gold 301、Now 638、有線614及654台周日早上7時30分直播）
位列東岸第5嘅華盛頓聯隊，頭號球星朗尼近日新聞多多，繼早前被英國傳媒影到背住老婆麥露蓮喺夜場攬女後，前仗仲因惡意侵犯對手領紅被逐，上場坐完波監後再被追加停賽處分，今場繼續冇得落場。
查實呢位前曼聯球星自從宣布下年1月重返英格蘭球壇加盟打吡郡後，華盛頓聯隊戰績就有下滑迹象，近7場聯賽贏得1場，季後賽席位唔穩陣，士氣點會好。相反衝擊引入前巴塞球星保贊後，戰力大增，近5仗主場更獲得4勝1和驕人成績，呢3分可謂志在必得。
「雙聯戰」鬥謹慎吼細盤
同時間費城聯主場同阿特蘭大聯上演東岸榜首大戰，費城聯主場3連勝，但阿特蘭大聯近3仗作客同樣擸晒9分，高手過招大家都唔想失分，相信會踢得比較謹慎，睇番近兩次交手全開2球或以下，中位數2.5球入球細值得再追。
（myTV Gold 302、Now 639、有線615及655台周日早上7時30分直播）
最後遲啲開波嘅聖荷西地震主場鬥奧蘭多城，奧蘭多城近期開局踢法保守，近4仗聯賽3次半場同對手鬥到難分難解，半場和捧得過。（myTV Gold 302、Now 639、有線615及655台周日早上10時30分直播）