搶分爭玩季後賽
周四早上美職激戰連場，等阿King同大家講講過關心水。其中科羅拉多急流將會同洛杉磯銀河上演季後賽爭奪戰，銀河爭入場券已經冇失分餘地，今場作客肯定主動，隨時一開波就同急流鬥攻，中位數1.5球半場大咪走寶。
（myTV Gold 301、Now 638、有線614及654台周四早上9時直播）
近期銀河頻頻失分，目前更跌出西岸前7名，暫時失去季後賽席位；不過睇真啲，銀河進攻問題唔大，除咗頭號球星伊巴謙莫域繼續瘋狂數胡之外，新加盟嘅阿根廷攻擊手基斯甸柏禾都交足功課，上仗落後3球情況下，一度逼和勁敵西雅圖海灣者，最終仍輸3比4十分可惜，可見主帥舒洛圖拿捏球隊攻守平衡嘅功力依然差啲火候，為搶分今仗惟有繼續以攻代守。銀河近4仗有3次半場開2球或以上，今場對住急流隨時一開波就鬥攻，中位數1.5球半場大要得過。
紐約城當弗追「多」鋪
另外紐約城主場同FC多倫多，啱啱升做東岸1哥嘅紐約城，近期豪取5連勝，今仗乘主場有力再搶Ｗ，主勝值博。最後皇家鹽湖城主場鬥聖荷西地震，地震有歷克利馬同積臣尤艾爾兩大主力離隊踢太公波，實力大受影響，為免全失3分今場肯定死守，中位數3.5球入球細值得留意。