黃潛豆腐渣防線
周一凌晨西甲壓軸大戰，維拉利爾主場挑戰皇家馬德里。「黃色潛水艇」豆腐渣防線到今季依然未有改善，搶分只有靠以攻代守；皇馬雖然傷兵滿營，前場依然有唔少頂級球星壓陣，加上兩軍相遇常演入球騷，今場中位數3.5球嘅大盤值得再追。（Now 611及632周一凌晨3時直播）
「銀河艦隊」季初飽受傷病潮影響，繼馬高阿辛斯奧、夏薩特及洛迪高高斯等人成為十字軍後，近日再有艾斯高同占士洛迪古斯兩位攻擊中場加入傷兵名單，有人歸咎新體能教練杜邦嘅訓練方法有問題，搞到皇馬球員一個二個傷晒。好彩佢哋勝在人多，尤其「大聖爺」加里夫巴利獲主帥施丹解凍後演出對辦，搭住開季兩戰都有波入嘅射手賓施馬，鋒力始終有保證。
維拉利爾入得又失得
「黃色潛水艇」維拉利爾上季僅獲第14名，令人失望，今季重點簽入中堅艾比奧爾希望捲土重來，可惜無助解決後防鬆散問題，開季兩戰不勝之餘夾埋更失咗6粒波，開咧戰已經同CF格蘭納激和4比4。好彩前線有卓禾斯同謝拉特摩蘭奴兩大攻擊手領軍，連同老大哥辛迪卡索拉，進攻手段充裕。加上「黃潛」近5次同「銀河艦隊」對撼，有4次開4球或以上，今場兩軍駁火鬥攻，中位數3.5球嘅入球大好路。