4戰魚腩先至全勝
歐洲國家盃外圍賽C組爆發榜首戰，北愛爾蘭主場迎戰德國，德國啱啱喺主場慘輸畀荷蘭，爭小組首名形勢變得好被動，今晚對住同組另一支爭出線隊伍北愛已不容有失。北愛現以4戰全勝佳績排榜首，但過去4仗對手全屬魚腩部隊，完美成績只係假象，整體實力同呢組兩大熱門德國、荷蘭有一大段差距，今晚絕地反擊嘅德國讓一球、球半唔算多，黑柴撐上盤。
（有線662及602台周二凌晨2時45分直播）
德軍上周五喺漢堡主場畀荷蘭反勝4比2，搞到兩回合對賽成績亦落於下風，同組第3勢力北愛爾蘭變成佢哋首要壓倒嘅目標，領隊勒夫上仗嘅換人調動失敗受到非議，今仗預期會排出較進取陣式，上仗賽前受傷嘅哥列斯卡同傷出嘅尼高舒侯斯，已經提早離隊返國，但對整體戰鬥力影響唔大，中場主力甘美治賽前話唔會因為輸咗一場波而過分擔心，尤其今仗對手實力唔算強，德國今場只要取得令人信服嘅大勝，就可以令批評者收口，語氣明顯充滿信心。事實上喺今年兩次國際賽檔期，德國都係一周雙賽，兩次都係第二場表現同成績遠勝第一場，相信今仗都唔會例外。
北愛兩大鋒將鬧入球荒
北愛正處於多年來本身嘅高峰，世界排名升到29位，今年5場國際賽全勝，包括4場歐國外，但要留意嘅係所贏對手只係世界排名84嘅白俄羅斯同100位嘅愛沙尼亞，呢4場波佢哋取勝過程都唔算輕鬆。睇番北愛自去年起根本未碰過真正強手，喺歐國聯遇過排名最高嘅只係27位嘅奧地利同42位嘅波斯尼亞，結果對呢兩隊主客共4戰全部輸晒，證明現時排名唔足以反映真正實力。佢哋上周中主場熱身賽約戰排名只係91嘅盧森堡，竟然只靠對手一個烏龍波至險勝1比0，前線兩大主力拿菲迪同麥根尼斯今夏忙於轉會影響備戰，開季後齊鬧入球荒，以現時狀態遇「日耳曼戰車」當然睇低一線。