唔經唔覺英超踏入第4輪，而且歐聯分組賽喺上周中亦進行咗抽籤，觀乎各隊起步嘅表現，似乎同我嘅預測相若，上季爭冠鬥到最後階段嘅曼城同利物浦，依然喺爭標大勢上鶴立雞群，其他18隊只能講句望塵莫及。
歐聯籤運好過倫敦雙雄
先講講歐聯抽籤，曼城同薩克達、薩格勒布戴拿模及阿特蘭大同處C組，利物浦則喺E組面對拿玻里、薩爾斯堡及亨克，雙雄出線16強毫無難度。至於另外兩支參加歐聯嘅倫敦雙雄，熱刺喺B組撞正拜仁、奧林比亞高斯及貝爾格萊德紅星，絕對唔易啃，而且高層奉行緊縮銀根嘅政策，唔好話要重演上屆殺入決賽嘅奇迹，淨係要保住聯賽前4都唔易。車仔喺新帥林柏特帶領下，仍處於重建階段，佢哋被編入有阿積士、華倫西亞及里爾嘅H組，入到16強已屬交到貨，相信保住聯賽前4嘅目標更實際。
除咗倫敦雙雄各有問題外，阿仙奴踢法上仍未做到攻守平衡，曼聯則繼續「成也普巴、敗也普巴」，表現飄忽不定，加上板櫈深度不足，實在難同曼城、利物浦抗衡，後兩者今季變動唔大，打法早已成形，同列強仍需行磨合相比，已贏在起跑線，因此今季英超仍屬「藍紅」爭冠局面。