另一場日聯盃8強戲碼，周三晚上由兩支亞冠盃代表浦和紅鑽、鹿島鹿角交鋒。首回合先作客嘅鹿島近況較佳，不過近排頻頻要踢作客波，體力有影響。況且紅鑽主場狀態低迷，近年同鹿島都唔多波入，捧番中位數2.5球入球細好過。
（有線602及662台周三晚6時30分直播）
鹿角同紅鑽今季都有份出戰亞冠盃，啱啱上周中8強首回合，兩隊齊齊作客環境下打和兩支中超球隊FC廣州與上海SP，體力消耗不少，其中鹿角連同周日聯賽以4比0擊敗清水心跳，更已經連續3場作客出戰，考慮到現時於聯賽排第2位嘅鹿角，仲有機會問鼎聯賽錦標，亞冠同日職雙線作戰對班波已經造成唔少負擔，呢場重要性較低嘅日聯盃或有所保留。
紅鑽上場聯賽作客僅以1比1和湘南比馬，近8仗僅1勝，當中3仗主場僅取2和1負，加上進攻中場柏木陽介有傷在身，球隊攻力肯定受損。兩軍近5次交手各贏2次、其餘1次握手言和，而且4次開2球或以下，呢場戰況會相當膠着，入波唔慌會多，中位數2.5球入球細值得留意。