「聖人」遇Big6例腳軟
今晚英超頭場，「聖人」修咸頓主場迎戰曼聯。連續2場失分嘅曼聯，仲有勞基梳爾及安東尼馬迪爾受傷，但從博彩嚟講被睇低絕非壞事，而且「聖人」一向欺善怕惡，對親Big 6球隊都腳仔軟，今場曼聯少讓平半，一於捧上盤。
（Now 621周六晚7時30分直播）
曼聯近2場聯賽先以1比1打和狼隊，上場主場更以1比2輸畀水晶宮，保羅普巴及拉舒福特喺呢2場同樣12碼宴客，打擊士氣，賽前官方宣布，勞基梳爾及安東尼馬迪爾肯定因傷缺陣，全部都係壞消息。
普巴孭完鑊要打爭氣波
不過正因為咁，曼聯嘅賠率明顯有降溫迹象，今場個客W有1.88倍，而讓球盤只讓平半，仍有七五水，比着平時邊有咁好分呀？平心而論，曼聯個人質素點秤都贏修咸頓，包括上場射入靚波嘅丹尼爾占士演出對辦，右閘雲比沙卡啱啱首度獲英格蘭國家隊徵召，攞番啲信心，而普巴連續2場孭鑊，今仗一定會醒醒定定，打番場爭氣波。
修咸頓上場聯賽作客2比0擊敗白禮頓，但與對方前鋒安多尼喺上半場中段領紅牌被逐、「聖人」大部分時間打多個有關，喺呢場有波入嘅列特文亦養傷倦勤，不宜高估。何況修咸頓近年季初例必慢熱，搞到開局堅差，而且於英超欺善怕惡，近5次聯賽鬥Big 6球隊輸4次，包括今季次輪喺主場1比2輸畀利物浦，今次撞正送走瘟神阿歷斯山齊士、志切反彈嘅紅魔，凶多吉少，上盤值得捧場。