拿高斯文領軍勁升呢
德甲獨腳戲慕遜加柏迎戰RB萊比錫，萊比錫升上德甲3季一直食住加柏，兩軍歷來6次交手，萊比錫取得4勝2和不敗佳績，加柏嘅保路西亞公園球場更加係萊比錫嘅福地，佢哋過去3次作客呢個球場都贏波而回，結合今季萊比錫嘅實力同進度，相信今晚可以保持作客恰死加柏嘅傳統，黑柴推介1.8倍客勝！
（Now 672、FOX+、有線653及613台周六凌晨2時30分直播）
雙方今季都由新帥領軍，對於加柏新帥馬高路斯嚟講，球隊畀萊比錫恰死嘅往績根本可以不理，皆因佢本身就係萊比錫剋星，記得上季佢帶領奧甲球隊薩爾斯堡，喺歐霸盃分組賽遇上同屬「紅牛系」嘅萊比錫，竟然可以主客兩回合雙殺對手，今季嚟到慕遜加柏，領軍至今成績算唔曳，問題係睇番陣上表現只能夠講話平穩，始終未遇到勁旅，前線進攻組織仍欠暢順，今晚初逢強敵會係重大考驗。
加柏近9仗主場不勝
值得一提嘅係加柏近兩年主場成績相當有趣，佢哋喺去年4月至今年1月期間，曾保持德甲主場12連勝，但今年1月底後如中魔咒，至今已經9場未贏過，包括今季聯賽頭炮悶和史浩克0比0。
萊比錫喺矚目少帥拿高斯文領軍後果然有好開始，開季各項賽事全勝表現清風送爽，奧地利右翼沙比薩喺新帥領軍後，連盃賽3場賽事交出3個入球同3次助攻，國腳前鋒迪姆華拿亦盛讚拿高斯文上任後令全隊升呢，自信有力挑戰新季各項錦標，佢亦因為欣賞拿高斯文而動筆同球隊續約到2023年，今晚作客有信心取得德甲3連勝。萊比錫上季兩負薩爾斯堡都唔係拿高斯文教，今晚兩大新帥碰頭，馬高路斯仲有冇得威絕對係一大疑問。