周五晚上日職獨腳戲，名古屋鯨魚主場挑戰一哥FC東京。啱啱經歷慘敗嘅鯨魚，聯賽走勢低迷，今場仲有後防主力宮原和也坐波監，面對强敵FC東京想翻身都幾難，平手盤捧FC東京好過。
（周五晚6時30分開賽、馬會網上文字直播）
排名聯賽第9位嘅名古屋鯨魚狀態直線下滑，早前雖然一度止住頹勢，以3比0擊敗川崎前鋒，可惜上仗喺主場打回原形，以1比5大敗畀橫濱水手之餘，仲有主力右閘宮原和也領紅牌被逐，今場停賽，可謂賠了夫人又折兵，加上另一守將吉田豐都因傷上陣成疑，後防隱患嚴重。鯨魚近13場聯賽僅贏1仗，球迷見到都唔開胃，今場想喺FC東京身上搶分都幾難。
迪亞高奧利華腳風順
榜首球隊FC東京，暫時只領先第2位嘅鹿島鹿角4分，為鞏固一哥位置，今場為全取3分絕對唔會手軟。近期FC東京雖然走勢有所放緩，上仗畀北海道札幌岡薩多逼和1比1，不過整體實力依然超班；頭號射手迪亞高奧利華至今斬獲12個聯賽入球，高踞射手榜前列，而且球隊對親鯨魚都特別醒，近5次交手取4勝1和，平手盤一於捧FC東京。