日聯盃今日上演4場8強次回合，直播戲碼鹿島鹿角主場鬥浦和紅鑽。紅鑽首回合主場輸2比3，為收復失地作客放手一搏；鹿角近6場主場得1場保持清白身，有5次總入球開3球或以上，今場續追中位數2.5球大啱數。
（有線602及662台周日下午5時30分直播）
紅鑽首回合主場雖然輸2比3，不過球隊喺落後0比3嘅劣勢下，連追2球保住出線希望，證明戰意十足。未踢首回合之前，紅鑽近3次鬥鹿角取得2勝1和，今仗要收復失地絕非不可能任務，就算作客出戰亦會全力搶攻。鹿角上場浪費咗領先3比0嘅大好形勢，睇到隊波後防唔多穩陣，而且佢哋近6場主場得1場冇失球，連業餘球隊北陸大學都可以入到佢哋波，面對志切求勝嘅紅鑽難以保持不失。睇番鹿角喺上述6場主場每場至少入2球，用強大鋒線彌補後防缺失，有機會再同紅鑽合演入球騷，中位數2.5球大盤捧得過。
岡薩多火猛鬥攻三箭
另一場8強次回合大戰廣島三箭主場鬥北海道札幌岡薩多，三箭首回合又係輸2比3，趁主場必爭取入波求翻盤；岡薩多近期火力全開，近4場入15球，有本錢以攻代守，今場一樣捧大盤。
（周日晚6時開賽）