今晚英超頭場，開季4戰贏晒嘅「1哥」利物浦，主場迎戰「喜鵲」紐卡素。雖然紅軍強勢開局，但下周中有歐聯後顧，今場或有所保留，紐卡素中前場堅多「十字兵」，加上遇強例必擺鐵桶陣博偷雞，3.5球嘅入球細更值得捧場。
（Now 621及611周六晚7時30分直播）
利物浦今季先奪歐超盃，頭4場聯賽更獲全勝，但主帥高普崇尚高壓迫打法，對體能要求極大。睇番陣中嘅穆罕默德沙拿、羅拔圖法明奴、沙迪奧文尼等今夏都要踢「太公波」，休息時間較少，而啱啱國際賽期又有佐敦軒達臣、安德魯羅拔臣、韋拿杜姆為國服役，征戰頻仍容易導致受傷，加上歐聯分組賽於下周中開打，利物浦衞冕首戰更要作客意甲勁旅拿玻里，主帥高普今仗或略作保留，贏波即收韁 。
喜鵲傷兵多焗擺鐵桶陣
紐卡素季前匆匆搵嚟布魯士接手，仍處於磨合階段，陣中仲有馬特列治、杜韋加爾、辛特麥斯明、安祖卡路爾等中前場因傷缺陣，冇辦法之下，布帥都要做「縮頭烏龜」玩死守。紐卡素近5場於法定時間僅得1勝2和2負，4次開2球或以下，包括控球率只得20%之下、作客爆冷以1比0擊敗勁旅熱刺，可見「喜鵲」遇強必定擺鐵桶陣，今場造訪利物浦一定照做博偷雞，紅軍頂到盡小勝，既然主勝冇肉食，不妨轉捧3.5球嘅入球細好過。