次世代新星湧現
周六晚上英超焦點大戰，曼聯將會於主場強戰李斯特城。「紅魔」領隊蘇斯克查勇於起用「新傑斯」丹尼爾占士、安達斯彭利拿等後生仔，次世代新星強勢上位表現毫不失禮，加上曼聯過往對親李城往往絕不手軟，呢場有力為主場球迷獻上一場勝仗，一於強捧主勝。
(Now 621周六晚上10時直播)
「紅魔」呢場有保羅普巴同連格等主力因傷上陣成疑，反而畀上任以來大力提拔新人嘅領隊蘇斯克查，更加堅決帶領曼聯行青春路線，其中最快上位嘅莫過於翼鋒丹尼爾占士，這位綽號「新傑斯」嘅威爾斯小將除了速度奇高，入球能力亦相當出眾，對上2場聯賽為「紅魔」上陣均有斬獲，此子於周中為威爾斯國家隊披甲，對白俄羅斯一仗更射入奠勝球，腳風大順，有佢搭住喺拉舒福特攻堅，火力可靠。中場方面，23歲嘅麥湯米尼表現亦愈見成熟，加上後防主力哈利馬古尼今場倒戈，對舊隊友前鋒占美華迪嘅踢法瞭如指掌，另一中堅域陀連迪路夫雖曾被嘲為「計時炸彈」，但一樣獲得續約兼加薪100%至15萬鎊，為表示自己物有所值，今仗肯定加倍落力，令曼聯攻守兩瓣都畀到人一定信心。
李城「華Dee」飄忽難靠
李城開季走勢不俗，4場聯賽2勝2和，不過球隊今夏賣走王牌中堅哈利馬古尼後，防守實力難免有影響，從「狐狸」近3場聯賽都有失球可見一斑。
況且，李城前鋒線依然過於倚重32歲老將占美華迪，惟「華Dee」近期狀態飄忽，效率難有保證。事實上，「紅魔」近年一直係李城剋星，近6次聯賽對賽豪取5勝，明顯格食格，今場主場出擊，勝望高唱入雲，主W係不二之選。