今晚意甲頭場爆發重頭戲，費倫天拿將會喺主場硬撼祖雲達斯。衞冕嘅祖記實力堅勁，今季於意甲亦強勢開局，王牌C朗（圖）腳風順到冇朋友，造訪後防不穩嘅「紫百合」，一於推介祖記客Ｗ。
（myTV Gold 301、Now 638、有線654、614、662及602台周六晚9時直播）
祖記連續8季稱霸意甲，今季延續強勢，頭2仗聯賽贏晒，包括上場面對爭冠勁敵拿玻里險勝4比3，能喺硬仗中搶得寶貴3分，直接打擊競爭對手，無論對士氣及爭冠之路均有一定幫助，極具冠軍相。王牌C朗同前鋒希古恩雙雙於聯賽開齋，前者喺國際賽期持續勇態，為葡萄牙出戰2場歐國外狂轟5粒，對立陶宛更食出大四喜，國際賽已累積93個士哥，係僅次於伊朗傳奇射手戴伊，成為史上國際賽入波第2多球員，愈老愈勁。
費倫天拿連敗態沉
另一邊廂，費倫天拿今季變動頗大，重點簽入奇雲保定同列貝利亦年事已高，況且後防脆弱問題仍未解決，開季頭2仗輸晒共失6粒，狀態堅沉，搞到教頭「飛機仔」蒙迪拿頭都痕埋，相信今仗都係捱打局面。加上兩軍近4次交手，祖記全部贏晒，擺明格食格喇，客勝有捧趁早。