哈利仔史達寧猛火
今晚歐國外A組焦點戰，英格蘭坐鎮主場迎戰保加利亞。「三獅兵團」頭2仗歐國外贏晒狂轟10粒，王牌哈利卡尼及史達寧腳風順到冇朋友，撞正青黃不接嘅保加利亞，主W熱到爆冇肉食，轉捧3.5球嘅入球大好過。
（香港開電視77台、有線662及602台周日凌晨零時直播）
以往喺大賽總係「雷聲大雨點小」嘅英格蘭，近兩年喺世盃及歐國聯均殺入4強，無論戰力及信心均不斷提升。查實「三獅兵團」不斷有新星湧現，例如阿歷山大阿諾特、占士麥迪臣及查頓辛祖等，活力十足，令主帥修夫基有本錢採取具侵略性嘅快速反擊，今屆頭2場歐國外贏晒之餘，更狂轟10粒，前鋒哈利卡尼及史達寧就佔咗7粒，佢哋喺今季英超開咧後亦頻有士哥，弗到漏油。
炒得起積弱保加利亞
保加利亞雖由巴拉哥夫出任主帥，可惜呢位94年世盃助國家取得殿軍嘅名宿，接手時仍處於青黃不接時期，只得喺俄超搵食嘅艾夫連波波夫較具級數，弊在佢獨力難支，今屆4場歐國外僅得2和2負，包括上輪喺主場以2比3輸畀科索沃，堅唔對辦。加上英軍主場特醒，連同上屆在內，「三獅兵團」近6場歐國外主場全部贏晒之餘，更攻入21粒，其中4場開4球或以上，既然主W賠率太熱，讓球主勝讓到兩球又略嫌冒險，轉捧3.5球嘅入球大仲上算。