周六晚西甲早場，皇家馬德里將會主場迎戰利雲特。「銀河艦隊」聯賽開咧幾場都同對手鬥攻，新一季踢法夠晒開放，而且利雲特近期對親皇馬都特別有計，兩軍隨時再演對攻戰，中位數3.5球入球大值博。
（Now 632周六晚上7時直播）
上季季尾重執皇馬教鞭嘅功勳教頭施丹，為帶領「銀河艦隊」駛回正軌，今夏轉會窗大膽增兵，其中最矚目肯定係引入比利時強援夏薩特（圖），皇馬自C朗離隊之後，一直欠缺領軍人物，才華橫溢嘅「夏神」早就同世界頂級球星比肩，能力毋庸置疑，自然畀球迷視為皇馬新一代嘅旗幟性球星，此子缺席開咧頭幾場波之後，終於有機會首次喺正式賽事為球隊上陣，表現值得期待，尤其呢場有莫迪歷因傷倦勤，要同坐波監嘅加里夫巴利雙雙缺陣，更需要比利時人挺身而出。好彩皇馬老臣子賓施馬開季表現都夠弗，3戰入2球兼貢獻1助攻，國際賽期未獲國家隊徵召嘅呢位法國前鋒，絕對可以養精蓄銳全力應付今場賽事。
利雲特上季偷過皇馬雞
可惜皇馬鋒力雖可靠，惟防線表現依然欠穩，開季3仗場場都有失波，計埋賽前熱身賽，球隊近6仗有4次開4球或以上，場面夠開放。況且利雲開咧近3仗取2勝狀態勇銳，而且近4次同皇馬交手，取1勝2和1負，包括上季作客巴拿貝球場以2比1擊敗主隊帶走3分，表現不落下風，呢場更有本錢偷雞，隨時逼到一班皇馬球星使出真功夫，今場入球騷走唔甩，捧中位數3.5球大盤。