小將國際賽齊上位
周末德甲壓軸戲上演榜首大戰，聯賽唯一全勝之師RB萊比錫主場迎戰班霸拜仁慕尼黑，萊比錫今季喺新帥拿高斯文帶領下開靚個頭，目前進度同狀態甚至比拜仁更好，拿高斯文賽前揚言以全取3分為目標，今仗萊比錫主場受讓有利，黑柴撐讓球主勝。
（Now 672、FOX+、有線653及613台周日凌晨零時30分直播）
萊比錫開咧後喺德甲3戰全勝，暫以兩分壓住次席嘅拜仁（未計周六凌晨禾夫斯堡嘅成績），擊敗柏林聯、法蘭克福同慕遜加柏都未受太大考驗，而且陣中大批小將已屆成熟黃金期，喺啱啱結束嘅國際賽期同拜仁兵一樣大放異彩，尤其德國國家隊喺歐國盃外圍賽作客北愛爾蘭一役，今晚對戰兩軍共有7名球員為德國正選上陣，拜仁有門將紐亞、中堅歷卡斯蘇尼、中場甘美治同前鋒基拿比，萊比錫就有左右閘侯斯頓保、高路斯達文同箭頭迪姆華拿，而德國隊兩個入球，亦分別由兩軍嘅侯斯頓保同基拿比取得，可見佢哋已成為德國國家隊命脈。
萊比錫新帥拿高斯文大讚球隊進度比佢預期更好，佢話現時戰鬥力已經追貼拜仁水平，今晚主場出擊甚有信心，事實上拿高斯文向以多變陣式同高速壓迫戰術見稱，昔日帶領技遜一籌嘅賀芬咸，3度主場對拜仁已經贏過兩次，如今帶住實力更強嘅萊比錫已具備挑戰班霸實力。
拜仁收起古天奴比列錫
拜仁近兩輪聯賽大勝，狀態逐步重返正軌，但新兵菲臘比古天奴同比列錫仍需時間融入球隊，之前遇弱仲敢畀佢哋上陣攞感覺，今晚作客遇強，教練尼高高華會先畀呢兩位未十足新援擔任後備，拜仁經驗雖稍勝，但最強防中查維馬天尼斯仲未夠弗擔正，國際賽後作客紅牛球場絕對唔易啃。