啱啱先打完兩輪國際賽，話咁快今晚又有英超，由夜晚7點半去至凌晨共有7場，由食晚飯睇到食消夜，絕對係追月夜最佳節目。
英超兩強續勝雙膽，當然係講榜首雙雄利物浦同曼城喇，佢哋今晚分戰「喜鵲」紐卡素及諾域治，應該實食冇黐牙。紅軍開季4場聯賽全勝，勢頭強勁，要喺主場捉「鵲」冇難度，唯一嘅隱憂，係上仗穆罕默德沙拿獨食失機，嬲到面對空門咁滯嘅沙迪奧文尼紮紮跳，被換出嗰陣發晒脾氣，呢個時候就係考考主帥高普點樣去協調，但利物浦從未贏過英超冠軍，我相信球員亦會大局為重，放下恩怨全力爭勝。
熱刺撲「水」有支持
曼城雖有中堅拿樸迪重傷長抖，但佢哋一向以攻代守，淨係史達寧、奇雲迪布尼都弗到漏油，造訪實力麻麻、後防不穩嘅諾域治，豈有不勝之理，因此呢兩隻膽非常穩陣。至於兩腳方面，季初表現飄忽嘅曼聯，今晚主場迎戰李斯特城，係時候贏波終止頹勢，而熱刺主場對水晶宮，近5次聯賽交手熱刺贏晒，呢隻腳冇甩拖，祝大家人月兩團圓。
金句：國家隊賽後今晚戰火重燃，英超兩強續勝雙膽射兩腳。