另一場歐國外大戰，周六凌晨E組斯洛伐克將會主場硬撼克羅地亞。克羅地亞自去年闖入世盃決賽之後，狀態開始跌Watt，今場仲有多位主力缺陣，實力再打折扣，為咗唔再進一步失分，預計今場開局會睇定嚟踢，半場和值博。
（有線603及604台周六凌晨2時45分直播）
克羅地亞喺2018世盃決賽周勇闖決賽，至今依然令球迷津津樂道，可惜大賽過後「格仔軍」表現明顯下滑，繼早前歐國聯喺A4組積分墊底，今屆歐國外表現亦未見起色，包括作客不敵弱旅匈牙利。今場「格仔軍」有多位主力缺陣，其中喺車路士表現回勇兼被寄予厚望嘅高華錫，不幸因傷落選，中場核心拿傑迪錫亦因為要處理球會事務，未能同克羅地亞大軍會合，加上前鋒卡拉馬歷倦勤，克羅地亞攻擊力肯定受影響。
克羅地亞表現慢熱
斯洛伐克上仗大炒阿塞拜疆5比1，其中隊長咸錫個人梅開二度，可見呢位前拿玻里中場轉戰中超之後，依然Keep得好弗，加上有國際米蘭後防核心史堅尼亞坐鎮後防，斯洛伐克整體實力同克羅地亞絕對有得揮。況且克羅地亞近3仗歐國外，有2次半場同對手打和，表現明顯慢熱，預計今場都好難係比賽早段打破僵局，捧半場和啱數。