宿敵對決必搏槌
今晚歐洲國家盃外圍賽C組爆發宿敵對決，德國喺主場火併荷蘭。「日耳曼兵團」於歐國外3戰贏晒狂轟13粒，前鋒迪姆華拿近期腳風轉順，夥拍基拿比、馬高列奧斯火力一樣咁猛；荷蘭要爭出線亦唔會坐以待斃，加上兩軍咁多牙齒印，近年碰頭例必鬥攻，捧中位數2.5球嘅入球大更划算。
（有線662及602台周六凌晨2時45分直播）
迪姆華拿弗到漏
德國上年於世盃災難性出局，儘管主帥勒夫堅持「死因」唔可以賴晒傳控打法出事，但佢之後亦作出微調，加入更加直接嘅反擊元素，頭3場歐國外贏晒之餘，更攻入13球，成功從谷底反彈。今次雖有王牌利萊辛尼因傷落選，好彩前鋒迪姆華拿及時翻生，開季3場聯賽為RB萊比錫轟入5球。翼鋒基拿比近6場國際賽亦入4粒，連同靚仔球星馬高列奧斯連續2場歐國外有士哥，德國火力唔講得笑。除咗上述嘅三叉戟之外，勒夫今次首度徵召新人禾特舒密特，呢位弗賴堡前鋒唔單止開季頻有入波，喺之前U21歐國盃更以7球榮膺神射手，勢必成為德軍秘密武器。
另一邊廂，荷蘭由於之前要出戰歐洲國家聯賽，所以喺歐國外只踢咗2場，可惜僅獲1勝1負得3分，落後打多1場嘅德國6分，亦比打多2場嘅北愛少9分，為求出線係時候要搶分。「橙衣兵團」一向崇尚進攻，喺頭兩場歐國外攻入6粒，攻力未見走樣，不過年輕中堅馬菲斯迪歷特今季轉戰意甲後，仍適應新環境影響狀態，頗多甩漏，令防線存隱憂。
近7交鋒入22球
由於兩軍太多牙齒印，1974年前西德令贏盡掌聲嘅荷蘭失落世盃，1988年輪到「橙衣兵團」喺德軍地頭勇奪歐國盃，令每次交手都充滿火藥味，誓要贏波攞彩，容易炮製入球騷。講到近7次正面交鋒，兩隊共轟入22球，其中6次開3球或以上，包括今屆歐國外首循環德國作客險勝3比2，荷蘭為搶分為面子，今仗戰意必堅實多波入，轉捧2.5球嘅大盤穩陣。