周五凌晨歐國外，仲有F組「1哥」西班牙作客鬥羅馬尼亞。「狂牛軍團」貴為外圍賽之王，今屆繼續强勢表現，加上羅馬尼亞踢法絕對唔保守，呢場就算贏唔到，都肯定唔會坐以待斃，勢同西班牙鬥攻，一於吼實中位數2.5球入球大。
（有線602及662台周五凌晨2時45分直播）
全心贏波獻安歷基亡女
西班牙前主帥安歷基為咗專心照顧病重嘅愛女，早前無奈辭任「狂牛」領隊一職，可惜囡囡最終未能戰勝病魔與世長辭，因此呢場波對國家隊嚟講絕對係名副其實嘅「帛金波」，「狂牛」眾將肯定希望將3分獻畀安歷基同佢屋企人。查實接掌教鞭嘅助教摩蘭奴，過去2仗嘅執教表現都有板有眼，包括上仗3比0輕取瑞典，今次大軍重召近況弗爆嘅丹尼施巴路斯同柏高艾卡沙，球隊進攻板斧有多幾瓣。
暫時以得失球差優勢力壓瑞典排名F組第2嘅羅馬尼亞，整體質素雖然不及西班牙，不過今屆4戰2勝1和負嘅成績都唔失禮，4戰全開3球或以上。球隊最出色嗰瓣肯定係進攻，其中名宿赫傑之子伊蘭斯赫傑，早前帶領國家青年軍闖入U21歐國盃4強之後，已日漸喺1軍站穩陣腳，佢嘅好拍擋佐治普斯卡斯，今屆亦已經斬獲3球，兩人雙劍合璧，有力喺西班牙後防發難，兩軍鬥攻格，中位數2.5球入球大值得留意。