召埋「小法老」狂炸阿美尼亞
今晚歐國外J組第5輪賽事，「1哥」意大利作客阿美尼亞。「藍衣兵團」雖有恩斯治尼因傷退隊，但主帥文仙尼手中大把籌碼，鋒線已有恩莫比尼、比洛迪、費達歷高基艾沙爭崩頭，連轉去中超掘金嘅「小法老」艾沙拉維都徵召埋，相信邊個落場都會搶韁爭士哥，阿美尼亞隨時半場都頂唔住，捧半場客勝。
（有線604及603台周五凌晨零時直播）
意大利無緣上年世盃決賽周，文仙尼臨危受命接掌帥印，首要任務係殺入歐國盃決賽周，佢喺球員時代雖然參加過90年世盃，可惜生不逢時，因為意軍當年坐擁巴治奧、史基拉斯、維埃里、沙連拿、簡路維等前鋒，人才過剩，搞到「文哥」成個大賽都坐冷板，勢估唔到輪到佢教波，亦要面對「選擇困難症」。
意大利頭4場歐國外贏晒，共入13球，查實4場都用唔同嘅鋒線組合，除咗恩斯治尼之外，基本上冇人一定擔正，但今次恩斯治尼都受傷退出，亦剔走有紀律問題嘅摩斯堅恩，但依然有恩莫比尼、比洛迪、艾沙拉維、費達歷高基艾沙、貝拿迪斯治等候命，似乎「文哥」仍會採取「模糊策略」，唔會寫包單邊個正選，等佢哋更搏命爭取表現。
阿美尼亞得MK仔擔大旗
另一邊廂，阿美尼亞續有剛轉戰意甲嘅「MK仔」米希達利恩擔大旗，頭4場歐國外取得2勝2負，表現一般，連同之前歐國聯在內，近6仗只得1仗冇失波，防線唔多穩陣。睇番意大利頭4場歐國外，有3次喺上半場已取得領先優勢，加上一眾前鋒為博上位必定搶韁，半場客勝更值得捧場。