黃金9月發圍之時
今日正式踏入9月，亦正係阿仙奴發圍之時！事關9月係阿仙奴參與英超以來成績最好嘅月份，上季就曾創下4連勝佳績，今晚英超「北倫敦打吡」，阿仙奴主場對同市死敵熱刺，主隊可望食住呢個旺勢，讓平半樂比撐「兵工廠」上盤！
（Now 611及621周日晚11時30分直播）
阿仙奴近年嘅軌迹都相當接近，季初往往畀到球迷驚喜，更屢屢出現「黃金9月」嘅盛況。英超成立以來，佢哋喺9月總共贏過60場，勝率高達61%，兩樣嘢都係咁多月份之中最高，不過過多兩個月就會出現「黑色11月」，成績急瀉，幾乎季季都有類似嘅走勢。當然呢個只係大數據大方向，唔係話阿仙奴每逢9月就贏硬，但無可否認阿仙奴季初確係特別順，原因之一係阿仙奴多年來都受傷兵問題折磨，每當其他盃賽殺到埋身時，球隊板櫈深度不足嘅問題就會浮現，所以季初時期「兵工廠」多數會出現一段小陽春。
事實上，今季嘅阿仙奴確實令人憧憬，其轉會操作被高度讚揚，尼高拉斯比比、丹尼施巴路斯甚至大衞雷斯嘅加盟都被指對症下藥，即使上仗不敵利物浦1比3，但都明顯見到兩隊嘅距離係接近咗，睇到球隊未來希望。
熱刺作客曳到得人驚
熱刺今季開局明顯唔順，開鑼戰面對實力平庸嘅阿士東維拉艱苦反勝，上輪主場對紐卡素久攻不下輸0比1，球迷睇到眼火爆，主將基斯甸艾歷臣因轉會問題未列正選，亦係發揮欠佳嘅主因。
其實自上季季中開始，熱刺作客成績就相當得人驚，聯賽創下6連敗劣績，若計埋盃賽更係11場輸9場，喺今季睇唔到有任何改善嘅情況下，作客酋長球場難以看好。