鯨魚沉淪焗住死守
今晚日聯盃8強首回合，川崎前鋒主場鬥名古屋鯨魚。鯨魚近況極沉，不過前鋒主場出擊亦相當慢熱，面對死守球隊，總係老鼠拉龜冇碇埋手，連續4場半場皆與對手不分勝負，半場和值得捧場。
（有線604及603台周三晚6時直播）
季初表現不俗嘅鯨魚，愈踢愈沉，上場聯賽以1比2輸畀FC東京，2連敗共失7粒，防線錯漏百出，睇番佢哋自6月中日聯盃附加賽次回合擊敗仙台維加泰後，近12場比賽贏得1場咁大把，狀態堅沉。由於今仗作客，相信鯨魚唔會貿然搶攻，況且佢哋嘅正選門將蘭格歷克獲澳洲國家隊徵召，要由土炮武田洋平把關，另外中場米本拓司亦因養避戰，兵源不足下做好防守乃重中之重，避免太多失波，令次回合難以翻身。
前鋒近7仗未贏過
另一邊廂，川崎前鋒以種子隊身份直入8強，因此今場係佢哋首次喺日聯盃亮相。但話雖如此，前鋒近況同樣欠佳，連同上場聯賽1比2不敵大阪櫻花後，近7仗未贏過，而且佢哋連主場威力都冇乜，近4場主場出擊只得1勝3和，當中有2場全場食白果，3次半場開0比0、1次開1比1，一來球員入局堅慢，二來對親擺鐵桶陣嘅客軍，初段總係冇乜破關板斧，更攞命嘅係奈良龍樹、大島僚太仍未好番，中後場實力受削，正宗「攻不銳守不穩」；加上鯨魚近3場日聯盃作客亦全開半場和，不妨追多鋪。