今晚西甲頭場，衞冕嘅巴塞隆拿作客升班球隊奧沙辛拿。雖然巴塞隊長美斯未必出得，但新兵基沙文上仗證明佢能擔大旗，加上近年交手經常大炒對手，直取讓球客勝。
（Now 632周六晚11時直播）
開咧首戰落筆打三更嘅巴塞，上場即刻翻生，喺主場狂數貝迪斯5比2，火力全開堅得人驚。其中今夏重金來投嘅基沙文踢出身價，個人省兩粒兼交出助攻，佢仲帶生埋拉芬拿艾簡達拿同生牯仔卡利斯佩雷斯，證明自己有力擔任進攻核心，而後兩者亦要趁機爭取表現，即使隊長美斯好大機會繼續因傷倦勤，但都唔使擔心「地上最強」嘅攻擊力。
近季炒慣奧沙辛拿
憑藉上季西乙亞軍資格升班嘅奧沙辛拿，儘管頭2場聯賽取得1勝1和，睇落唔錯，但對手只係雷加利斯及伊巴之流，實力難與巴塞相提並論。翻查紀錄，雙方近5次交手，巴塞獲4勝1和，明顯格食格，其中4次贏3球或以上，包括上次碰頭大勝7比1，就算今場作客亦冇有怕，照捧讓球客勝。