德甲班霸拜仁慕尼黑今季組班工作做得慢，搞到開咧都未Ready，聯賽揭幕戰主場失威賽和哈化柏林，好在過去兩周幾名新兵陸續到位兼上力，今晚再喺安聯主場出擊迎戰弱旅緬恩斯，當然要大勝回報球迷，拜仁讓到兩球半、三球係癲，但黑柴仍然撐上盤。
（Now 672、FOX+、有線653及613台周六晚9時30分直播）
拜仁上輪作客淨贏史浩克3蛋，新援菲臘比古天奴、比列錫都相繼後備登場，整體狀態感覺良好，預期經過多一個禮拜訓練，狀態已可及鋒而試，今晚隨時擔正都唔出奇，而狀態大勇，包辦晒拜仁今季5個聯賽入球嘅羅拔利雲度夫斯基又啱啱續咗長約，仲有傷兵哥列斯卡、查維馬天尼斯都相繼好番晒候命，球隊人腳復整，誓要以一場令人信服嘅勝仗，打開安聯球場今季勝利之門。
緬恩斯防線傷上加傷
緬恩斯未開季已經頭頭碰着黑，上季首席射手桑馬迪達、新援池東沅、防線領袖貝爾同中堅美維尼竟然相繼受重創，原本聯賽首戰作客弗賴堡踢落都算頂得住，點知踢到80分鐘後防另一支柱謝利祖斯迪都傷出埋，結果即刻畀弗賴堡連入3球淨吞3蛋，查實弗賴堡全場得3次中龍射門，認真慘情。緬恩斯上輪返到主場遇上慕遜加柏又失3粒，防線唔齊人後勁亦差，今晚貝爾、美維尼同謝利祖斯迪都繼續養傷，作客安聯球場恐怕失波唔只3粒咁少嘞！