今晚意甲頭場爆發首都打吡，拉素「掛名」主場迎戰同市死敵羅馬。兩隊積怨甚深，每次碰頭都激到打甩門牙帶血吞，雙方射手恩莫比尼及迪斯高一早撻着晒，為搶W必定火力全開，2.5球嘅入球大乃不二之選。（my TV Gold 301、Now 638、有線654、614、604及603台周一凌晨零時直播）
拉素恩莫比尼弗爆
拉素開季極速上力，首輪造訪「硬骨頭」森多利亞照樣大勝3比0。唔單止中場路爾斯阿拔圖交出2次助攻，射手恩莫比尼更省兩粒弗到爆，呢位經常失機為人詬病嘅意大利國腳，要用實際行動證明自己有料到，查實佢踢親打吡都零舍醒神，近6次有份上陣對羅馬嘅賽事，佢入咗5粒，堪稱羅馬煞星。
羅馬踢法有前冇後
另一邊廂，羅馬喺首輪3度領先之下，仍被熱拿亞逼和3比3，防線穿晒窿堅唔穩陣，近日立即從曼聯借入中堅基斯史摩寧，未知能否趕及披甲，但呢位後衞出晒名多甩漏，就算上陣都唔幫得幾多。好彩之前同球隊續約嘅王牌箭頭迪斯高撻着晒，首輪有入波之餘，仲助攻畀前線拍檔辛基斯安達先開紀錄，既然防守唔掂，勢必以攻代守，希望用贏打吡攞彩兼重上正軌。兩隊為搶分為面子，一定搏甩髀激到爆，近6次交鋒有5次開3球或以上，2.5球嘅大盤有買趁早。