今晚英超上演北倫敦打吡前，頭場先有愛華頓主場鬥狼隊。愛華頓上周喺英聯盃大炒林肯城晉級，火力全開；狼隊今季兼顧聯賽、歐霸盃兩條戰線都有上佳演出，兩軍近5次交鋒有4次開3球或以上，波童今場捧中位數2.5球入球大。（Now 621周日晚9時直播）
「拖肥糖」愛華頓上場聯賽雖以0比2輸畀升班球隊阿士東維拉，不過射門次數及控球比率都遠勝對手，表現其實唔算太曳，上周中佢哋喺英聯盃第2圈作客4比2反勝林肯城，幾名中前場主將包括基菲爾施古臣、伊禾比及李察利臣都有士哥，今晚返主場定必狂攻對手，避免連續兩場失分。
歐霸過關狼隊可專心聯賽
狼隊上周中喺歐霸附加賽主場贏意甲拖連奴2比1，兩回合計贏5比3順利殺入分組賽，暫時可將全副精神放番喺聯賽。狼隊今季聯賽連盃賽踢咗9場正式賽事，一共攞到6勝3和，加埋季前贏得英超亞洲挑戰盃冠軍，狀態、士氣都好對辦，作客葛迪遜公園亦有一戰之力。睇番雙方近5次交手只有1次打和0比0，其餘4次至少都有3球交收，今場2.5球大盤有2.15倍值博。