歐聯主場專剋英超兵
今屆歐聯分組賽今晚正式開打，其中E組首輪焦點戰，上屆冠軍利物浦作客硬撼拿玻里。兩軍連續兩屆喺分組賽碰頭，真係冤家路窄，拿玻里於歐聯主場專剋英超球隊，近5次主場出擊4勝英超兵，今場即使對住紅軍都唔會做縮頭烏龜，紅軍「埃及文明」鋒線又弗到震，鬥攻格局必捧2.5球嘅大盤。
（myTV Gold 303、Now 643、有線656及616台周三凌晨3時直播）
拿玻里近年係歐聯常客，主帥安察洛堤更曾帶領AC米蘭兩奪歐聯冠軍，而且執教過車路士，除咗經驗堅豐富外，面對英超兵亦有一定心得。拿玻里上屆分組賽亦同利物浦同組，2次對賽各得1勝，可惜最終與紅軍同得9分，因得失球較差黯然出局，今屆難得再度碰頭，梗係要報仇喇。事實上，拿玻里嘅高強度壓迫踢法一直剋住英超兵，近5次於歐聯主場面對英超球隊獲4勝1負，箭頭梅頓斯日前聯賽省兩粒，另一前鋒恩斯治尼亦告復出，連同啱啱加盟、上季效力熱刺嘅中鋒洛蘭迪候命，攻力有保證。
利物浦「埃及文明」弗爆
利物浦喺頭5場英超全勝，兼攞埋歐超盃，氣勢如虹，不過佢哋作客表現唔及主場，即使火力強大，但防守卻例必走樣，紅軍上屆6場歐聯作客，只得2勝4負，其中近4次歐聯客戰只得2勝2負，全開3球或以上。而且正選門神艾利臣比加仍要養傷，由副選門將阿祖安卡斯迪路把關今季打咗6場，只得1場冇失波。好彩「埃及文明」鋒線穆罕默德沙拿、羅拔圖法明奴同沙迪奧文尼保持水準，聯賽連歐超盃在內，紅軍今季所入嘅17球中，3人就佔咗12粒，弗到冇朋友，今仗勢必以攻代守，推介2.5球大盤。