周三凌晨歐聯H組大戰，車路士將會主場硬撼華倫西亞。名宿林柏特領軍嘅車仔今季大打青春風暴，不過一班年輕球員喺主場球迷面前表現反而比較拘謹，加上「蝙蝠軍團」出戰歐聯小組賽不嬲謹慎行事，呢場作客肯定死守應戰，戰況隨時陷入僵局，中位數2.5球入球細好路。
（Now 645、有線603及604台周三凌晨3時直播）
車路士小將主場放唔開
林柏特今季執起車仔教鞭之後，勇於起用隊中年輕新才俊，除上季跟隨林柏特喺打比郡征戰嘅美臣蒙特頻頻獲得上陣機會之外，譚美阿巴謙亦逐漸坐穩正選前鋒位置，一班小將好爭氣，用實際表現回饋主帥嘅信任，可惜佢哋喺主場出擊發揮就有待改善，早前2次聯賽主場都贏唔到波，先後遭李斯特城同錫菲聯逼和，為免歐聯受聯賽主場走勢影響，車仔呢場未必敢輕易冒進。
歐聯大戰前夕華倫內部自亂陣腳，前主帥馬些連奴因同班主林榮福意見不合結怨，最終畀後者辭退，由前西班牙U21領隊施拿迪斯接任，上任倉促嘅施帥出師不利，首戰喺聯賽就以2比5不敵勁敵巴塞隆拿，嚟緊出戰歐聯為免再出現尷尬賽果，取態肯定更加保守，呢場可以喺客場帶走1分，相信對華倫嚟講已經相當滿意，況且「蝙蝠軍團」近6場歐聯分組賽全開2球或以下，中位數2.5球入球細值得再追。