講笑咁講有金句才有稿費，筆者無論係講波或寫稿，都喜用金句這種較為生動的方式，簡述內容大綱，希望讀者能一目了然。眾所周知，歐聯今周有多場重頭戲上演，個人認為最矚目必屬E組和F組賽事。其中E組打頭陣有利物浦同拿玻里強強對碰，根據賽程編排，英意兩強首循環打完之後，要到小組賽後段才會再次碰頭，安排頗為有趣，E組其餘對手薩爾斯堡和亨克皆屬歐洲二流球隊，兩循環賽事想要成功突圍都幾難，因此利物浦同拿玻里自然成為出線大熱。紅軍喺英超以雷霆萬鈞之勢豪取5連勝，狀態大勇，就算要面對歐聯作客惡戰，都應該應付自如，今仗只要不讓拿玻里佔先機，對紅軍而言已經收貨，相信今仗利物浦能都坐和望贏。
巴塞未上力宜忍手
F組就是名副其實死亡之組，除布拉格斯拉維亞實力稍弱之外，其餘3支勁旅都極具競爭力，所以各隊兩循環面對弱旅都會旨在全勝。其中國際米蘭今季重點新援盧卡古有番鬥志，加上獲球會全力支持，相信有能力帶領藍黑軍團喺首戰旗開得勝。至於巴塞隆拿依然未上力，面對多蒙特勝負難料，個人認為如果想投注，呢場可免則免。