今屆亞冠盃8強兩場中日對決，首回合都和波收場，要踢埋今明兩晚次回合先知邊隊晉級。今晚先嚟浦和紅鑽主場鬥上海SP，紅鑽喺亞冠盃對上8次主場鬥中超兵獲7勝1和，主隊小讓平半必捧上盤。
（Now 670、Fox+、有線611及651台周二晚6時30分直播）
紅鑽首回合領先兩球優勢下畀上海追平，雖然有兩個作客入球喺手，今場只要和0比0或1比1，都可憑作客入球優惠晉級，不過為安全起見，主場唔會刻意求守。兩年前雙方曾經喺亞冠盃4強交鋒，當年紅鑽首回合作客和1比1，然後次回合返主場贏1比0，總比數以2比1淘汰對手，今晚可複製呢條晉級方程式。
主場鬥中超兵有心得
兩軍上周末喺本土聯賽齊齊輸波，紅鑽主場1比2輸畀大阪櫻花，上海SP作客FC山東則輸1比3，不過紅鑽嗰場聯賽排出「全土炮」陣容，3名巴西外援前鋒法比斯奧、中場艾華頓彭利拿及守將莫里斯奧卡維奴都冇落場；相反上海SP精銳盡出，巴西孖寶侯克、奧斯卡杜斯山度士搏足全場，亞援中場阿美度夫及阿拿奧杜域則各踢上、下半場，依然全失3分，計狀態及信心，上海SP似乎差少少。
連同上述提過兩年前一役，紅鑽近8次喺亞冠盃主場迎戰中超代表，攞到7勝1和壓倒性優勢，相反上海SP今屆4場亞冠盃作客未贏過之餘，仲要場場有失波，料難抵擋主隊狂攻猛打，紅鑽讓平半推介上盤。