伊巴壓陣有前冇後
聽朝美職激戰連場，又等阿King搵啲筍嘢畀大家。其中洛杉磯銀河主場鬥肯薩斯體育會，兩軍為爭季後賽席位冇得保留，銀河有頭號射手伊巴謙莫域壓陣，入波肯定唔會少，中位數3.5球嘅大盤值博。（myTV Gold 301、Now 638、有線614及654台周一早上10時直播）
銀河陣容雖然星味十足，可惜主帥舒洛圖明顯未能把握球隊攻守平衡，縱使戰神伊巴謙莫域今季斬獲23球，保持水準，但後防甩漏問題嚴重拖累球隊戰績，近4仗聯賽不勝變「送分童子」，當中3次開4球或以上，包括早前以3比4不敵西雅圖海灣者。暫列西岸第9位嘅肯薩斯體育會爭踢季後賽機會漸微，好在今仗有主力莊尼羅素踢完「太公波」歸隊，為求寶貴3分相信作客照搶，中位數3.5球入球大盤屬好路之選。
海灣者遇紅牛演入球騷
至於早啲開波嘅直播戲碼，西雅圖海灣者主場迎戰紐約紅牛，海灣者近3仗主場全開4球或以上，今場有「南美雙煞」雷迪亞斯同盧迪路攜手出擊，隨時同紅牛演入球騷，照捧中位數3.5球入球大。
（myTV Gold 301、Now 638、有線614及654台周一早上6時直播）
另外搭多場阿甲大戰小保加主場對學生隊，自射手賓尼迪圖離隊轉戰法甲後，小保加鋒力明顯減弱，近5仗聯賽全開2球或以下，今場料會繼續穩打穩紮，轉玩細盤。
（周一早上7時開賽）