今晚英超壓軸尾場，阿仙奴作客硬撼「大黃蜂」屈福特。阿仙奴雖有箭頭拿卡錫迪因傷倦勤，但正好畀貴價新兵尼高拉斯比比表演機會，屈福特開季脫腳兼易帥，未必可立即重上正軌，加上近3次碰頭阿仙奴贏晒，格食格之下客勝有計。
（Now 621及611周日晚11時30分直播）
比比放棄國際賽志切發威
阿仙奴賽前收到壞消息，箭頭拿卡錫迪因為左腳足踝受傷，至少要抖到10月。不過主帥艾美利驚都未驚過，一來陣中小將如古安杜斯、啱啱續長約嘅祖爾韋洛克堅sharp醒，二來貴價新兵尼高拉斯比比仲未開齋，話冇壓力就假嘅，有傳佢「詐傷」特登唔踢早前國際賽，就係一心想盡快融入阿仙奴，猶記得當年「高貝利大帝」亨利加盟頭幾場都冇波入，直至9月中對修咸頓先至開齋，但就係呢個士哥，釋放晒所有壓力即入球停不了，比比梗係想效法前輩舊路，盡快入波打破心魔，咁啱依家又係9月中，趁住拿卡錫迪缺陣係時候發威。
屈福特近3對賽全敗零入球
上季帶領屈福特取得英格蘭足總盃亞軍嘅主帥查維加西亞，今季頭4場聯賽只得1和3負，淪落包尾而慘食無情雞，成為今季首位被炒嘅英超領隊。雖然佢哋搵番科里斯回巢掌舵，但呢位教頭之前轉戰中超及執教愛斯賓奴都唔太成功，能否立即執掂隊波實屬疑問，而且「阿仙奴剋星」迪尼上月尾接受膝部手術，今仗肯定倦勤，攻力削弱。何況兩軍近3次碰頭，阿仙奴贏晒兼冇失波，擺明格食格喇，客勝有買趁早。