陣容不整踢法鬥開放
今晚續演歐聯首輪分組賽，重頭戲有A組巴黎聖日耳門（PSG）迎戰13屆冠軍皇家馬德里。雙方今場都有主力受傷或停賽影響，未能派出最強陣容應戰，考慮到A組其餘兩隊實力有限，PSG、皇馬好大機會攜手出線，首輪交鋒大家壓力都唔大，相信踢法會更加開放，中位數2.5球入球大有1.52倍勝在穩陣。
（myTV Gold 303、Now 643、有線616及656台周四凌晨3時直播）
尼馬沙治奧拉莫斯停賽
PSG鬥皇馬係今屆32強分組賽其中一場最矚目戲碼，可惜今場雙方都唔可以派出最強陣容，PSG前鋒尼馬因為上屆喺16強被曼聯淘汰後，公開批評球證被秋後算帳罰停賽2場，今場肯定缺陣，另外兩大射手基利安麥巴比、卡雲尼亦因傷連續2場聯賽冇上陣，復出機會不大；皇馬方面就有中堅兼隊長沙治奧拉莫斯及拿祖費南迪斯停賽，中場莫迪歷、馬高阿辛斯奧及左閘馬些路亦因傷避戰，令星味大大減低。
同組對手弱壓力唔大
A組除PSG、皇馬之外，布魯日及加拉塔沙雷無論喺實力或經驗都差一截，就算今場邊隊輸波，只要餘下比賽發揮水準，仍有好大機會出線，心態上今場可放膽鬥攻。PSG對上11場歐聯主場從未試過交白卷，合共轟入36球，雖然今場缺少進攻三叉戟，但新兵莫路伊卡迪、沙拉比亞及安達靴里拉一樣有級數，當中後兩者加盟，目標明顯為加強中前場聯繫，配合原有嘅迪馬利亞及馬高華拉堤，進攻火力一樣唔可以睇小。
皇馬今夏重點收購夏薩特已於上場聯賽後備復出，今場可正選攻堅，況且原本以為會被棄用嘅加里夫巴利大打爭氣波，上場聯賽停賽更可抖足搏今仗。皇馬西甲開季4戰場場有失波，防線唔穩陣，既然前線交到功課，大有本錢以攻代守。兩軍踢法同樣有前冇後，與其估勝負，不如捧中位數2.5球大盤仲穩陣。