歐聯D組焦點有「C朗對決」，馬德里體育會主場硬撼祖雲達斯。西甲勁旅馬體會今季強勢引入「新C朗」祖奧菲歷斯，前場攻力大增，加上球隊過往喺地頭出戰歐聯表現一向有保證，乘主場之利無懼勁敵祖雲達斯挑戰，一於揀馬體會上盤。
（Now 645、有線603及604台周四凌晨3時直播）
馬體會「新C朗」開季搶鏡
馬體會今季大換血，高甸、基沙文及菲臘路爾斯等老臣子先後離隊，引入祖奧菲歷斯同捷比亞等新血，雖然陣容變動頗大，幸在鐵帥施蒙尼帶領下，新馬體會亦已逐漸磨合成形，其中被譽為「新C朗」嘅葡萄牙新星祖奧菲歷斯表現相當搶鏡，西甲開季4戰3勝，上場作客皇蘇更不惜收起部分主力，雖然最終以0比2落敗，不過一班主力有得抖一抖，呢場回師主場出擊絕對係不勝無歸。
祖記「真C朗」拍檔打柴
祖記雖有「真C朗」基斯坦奴朗拿度壓陣，可惜兩位中場好拍檔比真歷同杜格拉斯哥斯達上仗聯賽齊齊打柴，呢場上陣成疑，冇咗佢哋幫拖C朗威力大減，新加盟嘅荷蘭小將馬菲斯迪歷特又表現飄忽，呢場面對馬體會隨時出洋相。事實上，馬體會主場威力亦極具保證，近5場歐聯主場全勝，當中包括上屆歐聯16強主場以2比0擊敗祖雲達斯，兩軍再度相遇，馬體會讓平半捧得過。