今晚歐聯C組首輪焦點戰，曼城作客烏克蘭勁旅薩克達。「藍月亮」後衞拿樸迪因傷長抖，要用史東斯夥拍奧達文迪扼守中路堅牙煙，今仗隨時以攻代守，加上於歐聯分組賽作客例搶韁，1.5球嘅半場大值得捧場。
（Now 644、有線662及602台周四凌晨3時直播）
曼城主帥哥迪奧拿將控球戰術發揮至極致，尤其組織進攻要從後場開始，所以後衞一定要識得用波，令拿樸迪自加盟後深得哥帥器重。不過呢位法國守將之前聯賽受重創有排抖，哥帥焗用史東斯夥拍奧達文迪，前者擅上腳但畀人逼搶即騰晒雞，奧達文迪用波唔掂，「藍月亮」堅持傳控打法兩人即刻現晒形，日前聯賽爆冷輸畀諾域治，就係輸奧達文迪畀人逼搶搞到失守。
不過哥帥一向推崇「進攻係最佳嘅防守」，因為前線實在勁到癲，阿古路開季後場場有波入，史達寧亦頻頻士哥，連同今季已交出5次助攻嘅奇雲迪布尼，頭5場聯賽已經入咗16粒，絕對有本錢以攻代守。曼城每逢歐聯分組賽作客分外搶韁，近9次有7次半場開2球或以上，為免重蹈上仗輸波覆轍，梗係想盡快入多幾粒鎖定勝局。
薩克達進取入得失得
烏克蘭班霸薩克達係歐聯常客，咁啱上屆分組賽亦係與曼城同組，最終只得小組第3，6場共入8球失16球，連同前屆在內，近3次鬥曼城取得1勝2負，全部半場皆開2球或以上，似乎雙方交鋒都堅進取，1.5球嘅半場大更可取。