英超球隊於上屆歐洲賽威到盡，其中熱刺喺限米煮限飯下，最終殺入決賽，僅負利物浦屈居亞軍，可謂超額完成，呢支北倫敦球隊今晚再戰歐聯，於B組首輪作客奧林比亞高斯，但要旗開得勝絕非易事。
（有線656及616台周四凌晨零時55分直播）
熱刺雖於今夏接連簽入尼當比利、賴恩施斯隆、盧施素等新兵，可惜後兩者仲養緊傷，而且放走咗捷比亞同洛蘭迪，無論係實力定臨場可調動人腳，查實同上屆差唔多，又要考吓主帥普捷天奴點樣左補右補。翻查紀錄，唔計上屆在中立場舉行嘅決賽，熱刺喺近7場歐聯客場出擊，只得2勝3和2負，上屆3場分組賽作客更加未贏過，主強客弱特點鮮明，唔好因為佢哋係上屆亞軍而秤先。
奧林比亞高斯深不可測
之前我都有評述歐聯附加賽奧林比亞高斯對卡斯洛達，卡斯洛達於前一圈反勝波圖，氣勢如虹，點知面對奧林比亞高斯即刻熄晒火，兩回合計大敗1比6出局，證明呢支希臘勁旅深不可測，今仗有主場之利，不容睇小。加上熱刺今仗作客，竟然要讓到半一過晒火，相信只係名牌效應，下盤有買趁早。