火力有限炒唔起
周五凌晨歐霸分組賽拉開戰幔，其中L組曼聯將會主場出擊鬥艾斯坦拿。紅魔近期進攻遇上阻滯，尤其前場欠缺穩定射手擔大旗，況且艾斯坦拿近年頻頻出現喺歐戰賽場，經驗有番咁上下，絕對唔會畀曼聯輕易取勝，睇好艾斯坦拿守住紅魔攻勢，中位數3.5球入球細係好路。
（myTV Gold 303、Now 643、有線616及656台周五凌晨3時直播）
名宿蘇斯克查上季中途接手曼聯教鞭，時間倉促未能真正貫徹自己執教理念，今季終於可以大展拳腳，除了英超要力爭前4之外，肯定希望喺歐霸攞到好成績，藉此穩固自己帥位。
「娃娃臉殺手」上任後重用一班年輕球員，丹尼爾占士同雲比沙卡兩位英倫小將亦因此成功上位，尤其前者被譽為「新傑斯」嘅威爾斯快翼，聯賽頻頻用上佳表現報答主帥對佢嘅信任，可惜無論係丹尼爾占士，或者「福仔」拉舒福特，都唔係以高入球效率見稱嘅球員，加上另一前鋒安東尼馬迪爾有傷上陣成疑，紅魔進攻瓣數極為有限，要喺對手密集防守殺出一條血路難度甚高。
艾斯坦拿實而不華專打突擊
哈薩克代表艾斯坦拿近年經常出現喺各大歐戰賽場，過去4屆都成功殺入歐霸分組賽，雖然牌面上同歐洲各路豪門有差距，不過已經累積唔少作戰經驗，實力不容忽視，呢場作客挑戰強敵曼聯，就算拎1分都已經有賺，先做好防務再伺機打突擊反而仲划算。況且曼聯近4仗全開3球或以下，進攻效率明顯有待改善，兩軍呢場隨時陷入僵持，寧願捧中位數3.5球入球細。