話咁快歐霸分組賽今晚開打，其中F組焦點戰，上屆亞軍阿仙奴作客法蘭克福。阿仙奴近期表現堅飄忽，主帥艾美利似乎會趁歐霸作出輪換，效果難料，法蘭克福於主場出戰歐霸特醒，仲有得受讓，讓球主勝有計。（myTV Gold 303、Now 643、有線656及616台周五凌晨零時55分直播）
艾美利隨時又玩變陣
阿仙奴今季未改飄忽特性，尤其係後防堅不穩，連續4仗有失波，包括上仗領先2粒之下，竟然畀屈福特逼和2比2，與守將連番犯錯有關，連利物浦名宿兼講波佬加歷查都忍唔住，批評阿仙奴後防總會出現一啲莫名其妙嘅失誤，同前幾年嘅利物浦好相似，就算領先緊都唔一定可保住勝果，我對呢點非常認同。
由於依家勢色唔對，我預計「善變」嘅主帥艾美利，會藉住歐霸試試變陣，一來畀頻頻甩轆嘅大衞雷斯同柏柏斯達夫普路斯抖抖，二來順便考察吓傷愈小將洛賀丁嘅狀態。輪換未必係壞事，但我覺得部分球員夾得較少，對整體發揮有一定影響，加上作客要讓波唔多划算。反過來說，上屆歐霸殺入4強嘅法蘭克福，儘管人腳大變，但開季後聯賽2場勝仗都係來自主場，有地利不容忽視，何況佢哋由上屆開始，近10次歐霸主場出擊未輸過，受讓必捧讓球主勝。